الجمجمه فيها ايه

تدخل الاسئلة الي الجمجمة..واكاد اسمع صوتها وهي تطحن الاسئلة كالخلاط المولينكس
اتمني لو استطيع ان اتسلل الي الداخل لاعرف الجمجمة دي فيها ايه
فأنا فخوره بها وبقدرتها علي هرس علامات الاستفهام حتي وان لم احصل علي اي اجابة
ههههههههههه وهنا.. تكمن الاثارة والمتعه مش كل الاسئلة ليها اجابات ياحبيبي
من الاسئلة دي خدوا عندكم

الكهرباء لما بتقطع بتروح فين ؟

لو فيه شجرة وقعت علي الارض في الغابة هل بقية الشجر هيضحكوا عليها ؟

ليه مثلاا في مدن كتير مثلا زي الجيزة حاطين لافته مكتوب عليها ابتسم انت في الجيزة
هل الجيزة حاجة تضحك ؟

لما بتطلب ساندوتش من اي مطعم وتحب تضيف عليه اي اضافة بيزودوا سعر السندوتش
طيب لما بتحب تشيل حاجة من محتوياته الساندوتش سعرة ليه مبيقلش ؟

ليه بيقولوا الحب اعمي مع ان كل اغاني الحب عن العيون
نور العين وسحر عينيك..وعنيك وحشاني..وعنيك كدابين ؟

لو كان الحب اعمي ..ليه واكلين دماغنا بالحب من اول نظرة ؟

لو اسمك ماجد..وطلعت طيار هتفضل مستحمل قد ايه الناس وهي بتندهلك كابتن ماجد ؟
الاخرس بيكلم نفسة ازاي ؟

ليه بيقولوا علي الشخص اللي نايم بعمق نايم زي البيبهات
مع ان البيبيهات بيصحوا كل نص ساعه ؟

معروف ان (( اللي يتلسع من الشوربة ..ينفخ في الزبادي))..بس هل (( لو نفخت في الزبادي))
يبقي معناه انك..((اتلسعت من الشوربه)) ؟

ليه البنات بتفتح بقها وهي بتحط ((ماسكرا)) ؟

ليه لما حد يقول قدامي كلمة الاقصر بتيجي في دماغي علي طول صورة الاثار
مع انه لو قال كلمة الاثار مش شرط تيجي في دماغي صورة الاقصر ؟

ليه الناس مبتقولش الرياضة فايز ومهزوم غير لما تتغلب ؟

ليه اللي سايق عربية ومشغل الراديو والكاسيت اول ميدخل شارع
ضلمة يروح موطي الصوت فورا ؟

ليه الناس بتقول لاي حد في الشارع يابشمهندس..ماعدا المهندس فعلا بيقولو له يادكتور ؟

ليه بيقولو في الاخبار مصرع 9 فلسطينين..ومصرع 50 في بغداد..ومصرع 85 في زلزال
ومصرع 112 في سقوط طائرة ..طيب مايقولو علي طول مصرع 250 واحد في نشرة اخبار.. التاسعه ؟

ليه لما تيجي تتصل بواحد تلاقي الارقام اللي بترد غلط مابتكونش مشغوله ؟

لو كانت الارض كرة .. زي مابيقولو... طيب الماتش هيبدأ امتي ؟
ليه هيفاء وهبي .. بتقول (( انا بردانه اح)) مع ان ((اح)) تتقال للحاجة السخنة يعني المفروض تقول (( انا بردانه بررررررر))؟

اذاكان ..زي مابيقولو الدنيا مسرح كبير..طيب انا بمثل ولا بتفرج ؟ واذا كنت من المتفرجين
هما المتفرجين بيقعدوا فين ؟؟

لو الصاعقة..نزلت علي حد بيموت متكهرب فورا..طيب لما الصاعقة بتنزل في البحر ليه السمك
مبيمتش متكهرب ؟

لو البوليس وهو رايح يبقبض علي حد شاف في السكة جريمة بتحصل
بيمنعها ولابيركز في المهمه اللي طالع عشانها ؟

هل فعلا في يوم من الايام في واحد ضرب عصفورين بحجر ؟

ليه لما بكون في البيت واتعصل بالسوبر ماركت (( اسمه سوبر ماركت ريشة ))
واقول الو سوبر ماركت ريشة...يرد عليا يقول ان شاء الله
يعني ان شاء الله سوبر ماركت ريشة..ولا ان شاء الله مش سوبر ماركت ريشة ؟

ليه لما تسال حد وتقلة شارع كذا فين يرد عليك بسؤال هما قالولك فين
طيب ماهما لو كانوا قالولي..مكنتش سالتلك..ثم مين هما اللي قالولي ؟

ليه الناس في الشارع بتستخدم ادوات..نداء لتوقيف اي شخص داوات نداء ملهاش اصل في اللغة
وينفع تنادي بيها علي اي حد زي بسست..والنبي يا..وياكبتن..وبقلك وخد يا..وايوة يا..
وليه ادوات النداء دي بتوقف الشخص المقصود بالذات ؟

ليه لما حدا بيحب يدي معلومه يبدأ بكلمة بيقلك..((بيقلك العربيات رخصت)) ؟

ليه لما تعدي علي ناس وتقول سلاموا عليكوا متسمعش منهم غير صوت
وع ..س س..هه ؟!

ليه المذيعة ببتمني لينا وقت ممتع مع الفيلم العربي اللي اتذاع 2000 مرة وهي عارفة كده كويس ؟
طيب ليه المذيعة بتقول اعزائي افراد الاسرة وهي متعرفش حد فينا ؟

طيب ليه اللي بيسانلي علي الساعه يحلفي ..الساعه كام والنبي ؟

ليه لما تقول لواحد حاجة وهو مسمعهاش كويس..تلاقية فجاة هو اللي علا صوته (( بتقول ايه)) ؟

ليه الكتابة علي التيشيرت بتكون لازم ..انجليزي..ليه محدش يكتب علي التيشيرت بتاعه بالعربي زي
(( اللي ذاكر ذاكر خلاص )) ؟

اذا كان زيت الذرة معمول من الذرة وزيت عباد الشمس معمول من زهرة عباد الشمس
طيب ال baby oil معمول من ايه ؟

ليه الواحد بيدوس علي الريموت كنترول بقوة وعنف لما الحجارة بتشطب ؟

التوأم الملتصق لما بيدخلوا السينما بيقطعوا تذكرة واحدة ولا تذكرتين ؟

لما البوليس يهجم علي شقة ويكسر الباب مين المسؤال عن تصليح الباب ده ؟

افرض انك شفت منظر مؤثر وانت تحت الميه ..ينفع تعيط ؟

الاعمي بيشوف ايه في الاحلام ؟

هل كان فيه اثار ايام الفراعنه ؟

هل ممكن يتعمل جبنة من لبن الامهات ؟

ليه المكرونه الاشكال..زي القواقع والحلزونيه..بيبقي طعمها احلي
من المكرونه العادية مع ان الاتنين مصنوعين من خامة وحده ؟

ليه بيقولو ( هدية مجانية) هو فيه هدية بفلوس ؟

ليه الوجبات المفرحة ال (happy meal ) بتبقي قليلة
المفروض الوجبة المفرحة تبقي مليانه بشكل يفرح ؟

ليه بنقول ..باي باي..ومبنقلش ..هاي هاي ؟


......................
هااااااااااااااااااا مقلتليش جمجمتك فيها ايه ؟؟